PRISHTINE- Ndërsa vendi po përballët me protesta dhe përleshje të ashpra në mes të policisë dhe protestuesve opozitarë, Kryeministri Isa Mustafa dhe zëvendësi i tij, Hashim Thaçi ndodhen në Bruksel.
Referuar njoftime nga kryeministria mësohet se Mustafa u takua sot në Bruksel me kryetarin e Parlamentit Evropian, Martin Schulz.
Gjatë takimit, ku ishin të pranishëm edhe zëvendëskryeministri i parë, njëherësh ministër i Jashtëm, Hashim Thaçi dhe ministri i Integrimit Evropian, Bekim Çollaku, kryeministri Mustafa, ka shprehur mirënjohjen e Qeverisë dhe të qytetarëve të Kosovës, për përkrahjen e veçantë që PE ka ofruar për Kosovën.
Thuhet se kryeministri Mustafa kërkoi përkrahjen e PE-së për liberalizimin e vizave për qytetarët e Kosovës, të cilët, siç u shpreh kryeministri, janë të vetmit në Ballkan që nuk mund të lëvizin pa viza duke mbetur të izoluar.
Për këtë takim ka njoftauar edhe Thaçi me anë të një postimi në rrjetin social Facebook.
Por, në kryeqytetin e vendit ku qeverisin Thaçi e Mustafa sot që para mesditës është situatë e tensionuar ku policia po përleshet me protestuesit, të cilët kerkojnë lirimin e deputetes Donika Kadaj-Bujupi.
