12 persona të përfshirë në përleshjet e djeshme në Romë u arrestuan gjatë natës. Në mesin e të arrestuarve gjithashtu Roberto Fiore dhe Giuliamo Castellino, përkatësisht udhëheqës kombëtar dhe udhëheqës roman të Forza Nuova.
“Nesër ne do t’i paraqesim një mocion urgjent Dhomës për të kërkuar shpërbërjen e Forza Nuova dhe lëvizjeve të tjera haptazi fashiste”. Kështu bëri me dije deputeti i Partisë Demokratike Emanuele Fiano i cili sot merr pjesë në aktivitetin e solidaritetit para Dhomës së Punës të Milanos, ndërkohë që Konfederata e Përgjithshme e Punës u shkatërrua dje gjatë protestave kundër pasaportës së gjelbër.
Të gjitha zyrat e Konfederatës sot janë të hapura, pas sulmit të djeshëm nën drejtimin e Forza Nuova në zyrën e Romës. Sulmi ishte pjesë e protestës kundër pasaportës së vaksinimit, që shkaktoi trazira dhe përleshje deri vonë në mbrëmje, me katër persona të arrestuar në kryeqytetin italian.
“Ajo që ndodhi dje është një plagë demokratike, një akt fyes ndaj Kushtetutës së lindur nga Rezistenca, një akt që shkel botën e punës dhe të drejtat e saj”. Kështu tha sekretari i përgjithshëm i Konfederatës së Punës Maurizio Landini duke hapur asamblenë e përgjithshme të sindikatës.
“Unë do të doja të ishte e qartë se nëse dikush ka menduar të na frikësojë, të na bëjë të heshtim, ata duhet ta dinë se lëvizjet e punëtorëve janë ato që kanë mundur fashizmin në këtë vend. Nuk kanë se si ata të na frikësojnë, nuk na trembin ”, shtoi Landini. “Të gjitha ato formacione që i referohen fashizmit duhet të shpërbëhen dhe kjo është koha për ta thënë qartë”, përfundoi ai./Opinion.al
