Studentë nga Universitete të ndryshme të Tiranës, kanë dalë sot në një protestë përpara kryeministrisë duke bërë thirrje për uljen e tarifave të shkollës. Sipas studentëve, MAS nuk i ka marrë parasysh shqetësimet e tyre, duke i detyruar të dalin në protestë. Marshimi i tyre nisi nga Korpusi drejt kryeministrisë, ku po vijon edhe protesta. Një ndër shqetësimet e tyre janë edhe kushtet në shkolla, ku sipas tyre Fakulteti i Gjeologji-Minierave është në kushte primitive.
Studentët kërkojnë nga qeveria përgjysmim të tarifave, pasi shprehen se për ta janë të papërballueshme.
Kërkesat e tyre janë si më poshtë:
- Përgjysminin e tarifave në të gjitha degët dhe nivelet e studimeve
- Heqjen e barrës financiare për certifikimin e gjuhës së huaj
- Heqjen e pagesës dyfish për kreditet nga provimet e mbartura
Sipas të rinjve, tarifat e studimit në fakultetet shtetërore po rriten nga vitit në vit dhe shumë prej familjeve po futen në borxhe për të paguar shkollën e fëmijëve.
Ata do të dorëzojnë një peticion me firma të mbledhura duke i kërkuar qeverisë heqjen e diskriminimit ekonomik.
