Protesta e studentëve ka hyrë në ditën e saj të pestë. Edhe këtë të shtunë, pas mbledhjes përpara fakulteteve, ata kanë marshuar në drejtim të Ministrisë së Arsimit.
Në këtë rrugëtim, ata kanë marrë edhe mbështetjen e qytetarëve. Të shumtë kanë qenë edhe qytetarët që i janë bashkuar protestës së tyre për arsim cilësor, kushte më të mira në konvikte dhe uljes së tarifave vjetore.
Plotësimi i dy kërkesave, për investime dhe heqja e pagesës për kredite në lëndët e mbartura nuk e kanë zbehur fuqinë e protestës. Edhe këtë ditë, ata kanë shprehur vendosmërinë për të mos u tërhequr, deri në realizimin e çdo kërkese të drejtuar Ministrisë së Arsimit.
Opinion.al publikon disa nga momentet më pikante të protestës së studentëve.
1-Shoferi i urbanit u jep dorën studentëve dhe i shoqëron me bori
Ka një solidaritet të admirueshëm protesta e studentëve e cila po mbështetet nga të gjithë shtresat e shoqërisë. Një video që qarkulloi gjatë ditës së sotme, tregon se si një shofer urbani në Tiranë ka ndaluar mjetin në rrugë dhe u shtrëgon dorën studentëve nga dritarja e urbanit.
2- Studentët refuzojnë bashkimin me banorët e “Astirit”
Banorë të zonës së Astirit kanë dashur të bashkohen me studentët protestues te Ministria e Arsimit, por kjo ka shkaktuar përplasje mes tyre. “Nuk duam, nuk ju pranojmë, nuk duam politikë”, – u shprehën protestuesit studentë, sipas tyre, ata nuk duan të bashkojnë kauzat pasi janë të ndryshme.
3- Bashkohuni me ne, mos rri në kafene!
Kjo thirrje ka bërë që të zgjohet ndjeshmëria qytetare, teksa gjatë rrugës u janë bashkuar edhe qytetarë të rastit.
Studentët po kërkojnë përgjysmim të tarifave dhe ulje të tyre deri në arsim falas, por gjithashtu edhe kërkesa të tjera për përmirësimin e kushteve studimore dhe atyre të banimit.
4- Gruaja u shpërndan ushqim studentëve
Nga protesta e ditës së djeshme një video mori shpërndarje të madhe në rrjetet sociale, ku tregonte një grua e cila ishte futur mes turmës së madhe studentore, ndërsa shpërndante ushqim për ta. Ky veprim i ka emocionuar mjaft studentët, të cilët pas kësaj janë shprehur se ndihen akoma dhe më të motivuar dhe më të bindur për të vazhduar, kur shohin se kanë dhe një mbështetje të madhe.
