Me sloganin “Boll më”, është zhvilluar ditën e sotme një protestë para Ministrisë së Drejtësisë nga aktivistët e shoqërisë civile, pas vrasjes së tre grave dhe plagosjes së tre të tjerave nga Dan Hutra.
Protesta është organizuar nga aktivistët duke shprehur zhgënjim ndaj institucioneve të cilat kanë liruar Dan Hutrën edhe pse me rekorde të theksuara kriminale, ku përfshihen vrasje e përdhunime.
“Dje ka ndodhur një krim i tmerrshëm. 3 gra janë vrarë nga dora e një burri dhe 3 janë plagosur. Ato nuk do kërkojnë më që policia të kapë vrasësin apo të bëhet reforma në drejtësi. Sot ne jemi përballur me një vrasës që ka kryer një rim që mund të shmangej. Ai ka vrarë gruan e parë dhe ka përdhunuar një tjetër, dhe policia nuk e di që ky është i rrezikshëm. Si ka mundësi që institucionet kanë dështuar për të mbrojtur jetën e këtyre grave? Duhet të flasim që e kemi normalizuar dhunën, femicidin e kemi konsideruar normal. Nuk është krim pasioni por vrasje e gruas. Ky është momenti të flasim më shumë”, u shpreh një nga protestueset./Opinion.al
