Anëtarët e qeverisë kanë mbajtur të njëjtin qëndrim kundër protestës së 6 dhjetorit të thirr nga kryetari i PD, Sali Berisha.
Për qeverinë protesta e mbajtur në ditën kur në Tiranë mbahet samiti Bashkimit Europian me vendet e Ballkanit Perëndimor, është një turp.
Edhe ministri i Brendshëm, Bledi Çuçi ka shkruar në rrjetet sociale të njëjtat argumente si kryebashkiaku i Tiranës Erion Veliaj dhe ministri i Mbrojtjes Niko Peleshi, duke thënë se kjo protestë tregon se Berisha i shërben Rusisë.
Sipas Çuçit, Berisha i do të keqen vendit dhe se më 6 dhjetor do që ti lërë një tjetër damkë turpi Shqipërisë në prani të ndërkombëtarve.
Reagim i Çuçit
Vetëm një antishqiptar si Sali Berisha, që i do të keqen këtij vendi nga dëshpërimi i non gratës dhe i rublave ruse që i dolën sheshit, kërkon të turpërojë Shqipërinë më 6 dhjetor, ditën kur Tirana mirëpret për herë të parë Samitin e Bashkimit Europian me vendet e Ballkanit Perëndimor. Në grahmat e fundit politike të tij, ky njeri nuk le rast pa tentuar për t’i bërë një tjetër të zezë Shqipërisë, fiks si të ishte një Konsull famëkeq i Vladimir Putinit. Jam i bindur se edhe mbështetësit e Partisë Demokratike, të cilët mund të kenë shumë arsye për të qenë opozitarë me qeverinë, do ta braktisin Sali Berishën në aktin e tij të radhës për t’i lënë Shqipërisë një tjetër damkë turpi në sytë e gjithë botës. Sigurisht që Tirana atë ditë do jetë kryeqyteti më i sigurt, më miqësor dhe më mikpritës i Europës.
