Policia e Tiranës ka proceduar në gjendje të lirë disa prej zyrtarëve të Partisë Demokratike, të cilët organizuan protestën e zhvilluar ditën e djeshme para Bashkisë së Tiranës
Bëhet me dije se janë proceduar penalisht Belind Këlliçi, Tedi Blushi, Klevis Balliu, Adriana Kalaja si dhe Adriana Tolka.
Përmes një njoftimi zyrtar, blutë bëjnë me dije se protesta ishte e paligjshme dhe se ata, në bashkëpunim me persona të tjera të paidentifikuar, kanë bllokuar rrugën, penguar qarkullimin e lirë të qytetarëve, si dhe duke prishur rendin dhe qetësinë publike.
Njoftimi i policisë:
“Specialistët për Hetimin e Krimit në Komisariatin e Policisë Nr. 1 proceduan në gjendje të lirë shtetasit A. T., A. K., K. B., B. K dhe T. B., pasi ditën e djeshme përpara godinës së Bashkisë Tiranë, në bashkëpunim me persona të tjerë ende të pa identifikuar, kanë zhvilluar një protestë të paligjshme, duke bllokuar rrugën, penguar qarkullimin e lirë të qytetarëve, si dhe duke prishur rendin dhe qetësinë publike.”
