15 të arrestuar për protestën e opozitës. Policia e Tiranës thotë se pas analizimit të pamjeve filmike, raport shërbimeve dhe provave të tjera të mbledhura, gjatë protestës së djeshme ku pati akte të dukshme dhune, policia ka arrestuar 15 protestues. Ata akuzohen për: “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”.
Gjithashtu u proceduan penalisht në gjendje të lirë 5 shtetas, si dhe janë shpallur në kërkim dhe po punohet për kapjen e 7 të tjerëve. Këta shtetas, thotë policia, gjatë protestës në Bulevardin “Dëshmorët e Kombit”, kanë çarë kordonin e policisë duke kundërshtuar e goditur punonjësit e policisë si dhe kanë thyer me mjete të forta, dyert, xhamat dhe vepra arti në hyrjen kryesore të Kryeministrisë.
Mes të arrestuarëve është dhe Florenc Hoxha, ish-drejtori i Policisë Bashkiake, në kohën kur ky institucion drejtohej nga kryetari aktual i opozitës Lulzim Basha.
Ndalimi i protestuesve, ka bërë një grup deputetësh të Partisë Demokratike të shkojnë në Drejtorinë e Policisë së Tiranës mbrëmjen e së shtunës për të kërkuar shpjegime. Mes tyre dhe punonjësve të policisë ka patur dhe moment të forta tensioni deri dhe përplasje fizike.
