Nënkryetari i PD-së, Edi Paloka, i ftuar në “Abcnews” ka folur në lidhje me protestën e opozitës që do të zhvillohet ditën e nesërme.
Paloka është shprehur se qëllimi i opozitës është masiviteti i protestuesve për të rrëzuar kryeministrin Edi Rama.
Demokrati nuk dha shumë detaje se çfarë do të ndodhë konkretisht në protestën e nesërme, por shtoi se protesta do të zgjasë sa të duan protestuesit.
Po ashtu, ai foli dhe për protestat paraardhëse të opozitës duke thënë se në fokus të tyre nuk kanë pasur dhunë. Sipas tij, çdo incident që ka ndodhur është provokuar nga policia me urdhër politik.
“Protestën e tretë të madhe, të cilat siç kemi deklaruar dhe rezultuar kanë qenë në rritje, nga ajo e 16 Shkurtit në 16 Mars dhe jemi të bindur që nesër masa e njerëzve do të jetë më e madhe. Ky është qëllimi kryesor. Kjo është ajo që e ka trembur. Edhe sondazhet e tij tregojnë se sot opozita është mazhorancë dhe Rama ka rënë ndjeshëm në minorancë.
Këto janë detaje që do t’i shihni nesër. Nuk mendoj se ka rëndësi të madhe për njerëzit. Çdo qytetar që mendon si ne, që ka bindjen si ne, nesër duhet të gjejë momentin të bëjë sakrificën e tij, të japë kontributin e tij, duke marrë thjesht pjesë në këtë protestë. Për të treguar dhe ai që edhe në Shqipëri fillon ndryshimi dhe ndryshimi fillon me largimin e Ramës. Pastaj, sa do rrinë, kush do flasë, këto janë detaje që merren organizatorët. Për detajet merren organizatorët. Zyrtare është që ne kemi thirrur shqiptarët. Sa do zgjasë protesta? Këto janë detaje teknike. Sa ta vendosin qytetarët. Ne nuk i ndalojmë.
Ne kemi zhvilluar protesta pasdite dhe të vetmit që janë tensionuar kanë qenë forcat e Lleshit. Nuk po them policia, po them për njerëz që sot marrin urdhra politik dhe zbatojnë vetëm urdhra politik. Janë gati të përleshen, të hedhin bomba me gaz edhe fëmijëve në mëngjes siç është rasti te Bulevardi i Ri. Nuk i vë faj çdo njeriu që mban uniformë, por ama nuk duhet të përdoresh.
Ne kurrë nuk kemi reaguar dhunshëm, pavarësisht akuzat kanë qenë se protestat kanë qenë të dhunshme. Nuk ke një polic të plagosur. Përkundrazi ke me dhjetëra qytetarë që kanë përfunduar në spital. Ne japim garanci se nuk nxisim askënd që të ushtrojë dhunë. Por ka një faktor tjetër. Mos të harrojmë që revolta, pakënaqësia është kthyer në urrejtje ndaj Edi Ramës. Po të jesh në turmë e ndjen këtë. Përderisa ne marrim përsipër protestën, ne marrim përsipër drejtimin e saj. Nuk jemi si Edi Rama”, tha Paloka/ Opinion.al E.Xh.
