Dita e sotme ka qenë e tensionuar në Parlamentin shqiptar. Zgjedhja e një kryeprokurori të përgjithshëm të përkohshëm nga mazhoranca, është bërë shkak për protestën e zhvilluar nga opozita mëngjesin e sotëm, përpara selisë së parlamentit. Qindra qytetarë të udhëhequr nga opozita kanë kundërshtuar ashpër vendimin e mazhorancës për vendosjen përkohësisht në pozicionin e kryeprokurorit, Arta Markun.
Protestat e sotme nuk i kanë shpëtuar as vëmendjes së mediave të huaja, ku shumë prej tyre e kanë pasqyruar këtë ngjarje në artikujt e tyre.
The New York Times shkruan: “ Policia shqiptare është përplasur me mbështetësit e opozitës, të cilët kanë tentuar të futen me forcë në ambientet e parlamentit për të kundërshtuar votën ndaj kryeprokurorit të përgjithshëm të përkohshëm këtë të hënë.
Rreth 3000 demostrues duke mbajtur flamuj Europian dhe ato amerikan, të shoqëruar me slogane antiqeveritare, janë mbledhur përpara parlamentit për të kundërshtuar zgjedhjen e Prokurorit të Përgjithshëm të Përkohshëm, të cilën e quajnë anti-kushtetuese.
Policia shtyu protestuesit pasi ata thyen kordonin e parë të sigurisë jashtë parlamentit ndërsa demonstruesit hodhën tymuese në drejtim të forcave të policisë.”
Edhe “Business Insider” ka bërë një raportim të shkurtër të situatës ku ndër të tjera shkruan: “Forcat e policisë kanë shtyrë protestuesit, teksa ata kanë hedhur gaz lotësjellës drejt tyre. Sipas mediave lokale ka disa të plagosur”.
“Los Angeles Times” i ka dedikuar një artikull më të detajuar kësaj proteste duke përshkruar edhe momentin e betimit të kryeprokurores Arta Marku.
“Opozita ka hedhur gaz lotësjellës edhe në brendësi të parlamentit, por qeveria arriti të votonte pozicionin e Arta Markut si kryeprokurore me 69 vota të mazhorancës nga 140 deputetë që ka parlamenti. Dy deputetë votuan kundër, dy të tjerë, bstenuan, ndërsa opozita e bojkotoi votimin. Betimi i Markut në parlament është bërë gjatë hedhjes së gazit lotësjellës.
Prestigjozja amerikane ka cituar gjithashtu edhe opozitën ku ka përshkruar me detaje fjalën e Bashës dhe Berishës në lidhje me situatën politike në vend.
Edhe “The Republic” ka bërë një pasqyrim të situatës, duke paraqitur edhe një fotografi nga momentet ku në parlament ka shpërthyer gazi lotësjellës.
