Gjykata e Tiranës ka vendosur masën “arrest me burg” për gjashtë protestues të opozitës. Arrest me burg u vendos për ish-drejtorin e Policisë Bashkiake, Florenc Hoxha, Ilir Hamedanin, Resul Dacin, Sajmir Rexhepin, Agim Peposhin dhe Ferit Dankshin.
Ndërkohë u lanë në “arrest shtëpie” shtatë protestues të tjerë dhe gjashtë morën masën “detyrim paraqitjeje”. Gjate seances se vlerësimit të masës së sigurisë avokati i të arrestuarve, Ivi Kaso tha se prokuroria nuk kishte asnjë provë për ushtrim dhune.
Më herët, Prokuroria kishte kërkuar masën e arrestit me burg për 14 nga të arrestuarit për dhunën në protestën e opozitës. Ata akuzohen për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”.
Në mbarim të seancës, deputeti demokrat Edmond Spaho u shpreh se vendimi i sotëm synon të dekurajojë protestuesit.
“Veprimet e policisë dhe prokurorisë motivoheshin politikisht për të dekurajuar qytetarët për të protestuar kundër qeverisë së Edi Ramës. Asnjë fakt, asnjë provë. Aty është prishur vetëm kërpudha e kryeministrit, forcat e policisë u hapën dhe nuk pati konfrontim me qytetarët. I dënoj me forcë këto veprime të policisë dhe prokurorisë, e turpshme ishte sjellja ndaj Florenc Hoxhës, ku policët me maska u futën në shtëpinë e tij”, u shpreh Spaho.
