Ka nisur grumbullimi i qytetarëve para selisë blu për të nisur protestën e opozitës që pritet të nisë në orën 12:00 në bulevardin “Dëshmorët e Kombit”.
Më shumë se një mijë efektivë policie ndodhen në terren për të siguruar mbarvajtjen e tubimit ndërkohë që tashmë është formuar edhe kordoni i efektivëve të policisë para kryeministrisë.
Po ashtu, dyert e Kryeministrisë janë “blinduar” për të shmangur depërtimin e protestuesve brenda godinës, ndërsa shtyllat janë lyer me graso në mënyrë që protestuesit mos të prekin kamerat.
Sipas gazetares Klodiana Lala të tjerë punonjës policie janë vendosur në lartësi, në tarracën e Kryesisë së Kuvendit për survejim.
Opozita thirri këtë të shtunë një protestë në bulevardin Dëshmorët e Kombit, tashmë disa javë pasi kryefjalë e debatit politik është hetimi i ish-zyrtarit të FBI, Charls McGonigal, edhe për lidhjet e tij me Shqipërinë.
Demokratët akuzojnë kryeministrin Rama se është përfshirë në një aferë korruptive me qëllim shkatërrimin e opozitës./Opinion.al
