Kanë nisur përgatitjet në Bulevardin “Dëshmorët e Kombit” para Kryeministrisë ku do të zhvillohet protesta e paralajmëruar nga opozita.
Ashtu siç ndodh në raste të tilla, porta hyrëse në Kryeministri është “blinduar” me veshje metalike, ndërsa janë vendosur kamera sigurie në shtylla.
Gjithashtu është montuar podiumi ku do të mbajnë fjalën përfaqësues dhe simpatizantë të PD-së.
Policia do të ketë rreth 1200 forca të policisë në terren, duke nisur nga ato të rendit, FNSH, Shqiponjat do të jenë në terren për mbarëvajtjen e protestës. Në gatishmëri do të jenë edhe forcat RENEA.
Gjithashtu edhe Garda e Republikës do të jetë e gjitha në gatishmëri për të kryer detyrën në ruajtjen e institucioneve. Ndërkohë në protestë të gjithë efektivët do të jenë të pajisur me maska kundragaz. Do të ketë edhe 5 autobote me ujë nëse do të ketë nevojë në raste incidentesh.
Tubimi i thirrur nga opozita pritet të nisë në orën 17:00 dhe do të zgjasë deri në 20:00.
