8 protestues janë arrestuar nga policia. Sipas një njoftimi zyrtar thuhet se 9 të tjerë po ndiqen në gjendje të lirë. Sipas policisë protestuesit kanë kundërshtuar, goditur me mjete të forta e lëndë plasëse (gurë, shkopinj, fishekzjarrë) efektivët, të vendosur me shërbim në ambientet përreth Kuvendit të Shqipërisë.
Për 8 të arrestuarit rëndojnë këto akuza: “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike”
“Në cilësinë e provave materiale janë sekuestruar kapsolla, doreza, kapuç, maska, pjesë metalike, flakadanë, etj. Vazhdon puna për identifikimin dhe vënien para përgjegjësisë ligjore edhe të personave të tjerë aktiv, të përfshirë në veprime të kundraligjshme gjatë protestës së ditës së sotme”, theksohet në njoftimin e policisë.
Një paralajmërim policia ka dhe për drejtuesit e opozitës tek thotë se ata duhet të distancohen nga dhuna dhe se për këto raste do të zbatohet vetëm ligji.
Në protestën që zgjati rreth 4 orë, protestuesit ndezën zjarre me goma makinash dhe hodhën shashka e fishekzjarrë në drejtim të kordonëve policorë, të shumtë në numër në rrethim të parlamentit. Në fillim të seancës plenare kryeministri Edi Rama foli për situatën e krijuar pas vendimit të opozitës për të hequr dorë nga mandatet parlamentare. Ai theksoi dhe një herë se shumica nuk ka ndërmend të bëjë asnjë hap pas lidhur me kërkesat e opozitës./ Opinion.al
