Ministri i Brendshëm, Taulant Balla ka thënë se dhuna e ushtruar në protestat e zhvilluara para Bashkisë së Tiranës është e pa pranueshme.
Pas mbledhjes së qeverisë, ai tha gjatë fjalës së tij se çdo akt dhune ndaj institucioneve dhe policisë dënohet ashpër.
“Përdorimi i dhunës në protestat të një prej fraksioneve të opozitës, pranë bashkisë. Unë e them shpesh dhe më duhet të ripërsëris, është e papranueshme dhuna ndaj institucioneve dhe mbi të gjitha dhuna ndaj punonjësit e Policisë së Shtetit. Ligji është shumë i qartë, se çdo akt dhune ndaj institucioneve dhe punonjësve të Policisë së Shtetit, dënohet dhe dënohet ashpër. Dhe përfitoj nga rasti që t’i kërkoj prokurorisë që të gjitha raste e referuara nga Policia e Shtetit të ndiqen me vëmendje dhe t’i japim një shembull të qartë të ndëshkimit të gjithkujt që guxon të mos respektojë ligjin”.
Sipas tij dhuna ndaj një punonjësi policie është dhunë ndaj shtetit.
“Dhuna ndaj një punonjësi policie është dhunë ndaj shtetit. Punonjësi i policisë është personifikimi i shtetit dhe kryen aty detyrën. Në këtë këndvështrim, mendoj që edhe ky fraksion i opozitës duhet të kuptojë që koha kur sulmoheshin institucionet ka mbaruar dhe ajo që na duhet është të kemi sa më shumë respektim të ligjit dhe të jeni të sigurt që policia e shteti do të vazhdojë të respektojë ligjin dhe vetëm ligjin”.
