Ish-deputeti demokrat Luçiano Boçi ka thënë se policia dhe autoritetet shtetërore po provokojnë protestuesit që po i drejtohen Tiranës. Në një lidhje me “Ora News”, Boçi tha se do t’i përgjigjen çdo provokimi dhe se qytetarët do ta zbrazin inatin përpara kryeministrisë.
“Ne kemi ngulmuar tek masiviteti, protesta është paqësore. Por këto që ndodhin në kryqëzimet e rrugëve mund të krijojnë precedent të rrezikshëm që zemërimi dhe revolta të shprehet në sheshin para kryeministrisë. Ne jemi për protestë paqësore, por do t’i përgjigjemi me çdo lloj monedhe çdo provokimi që vjen nga forcat e rendit. Ka pasur irritim të qytetarëve për ta shprehur zemërimin. Unë gjykoj që të gjitha këto do konvergojnë në pikën e vlimit në Tiranë”, ështe shprehur Boçi.
Policia e Shtetit ka angazhuar rreth 1600 efektivë sot për protestën e opozitës. Mësohet se janë instaluar shumë kamera sigurie, ndërsa për të shmangur ngjitjen e protestuesve në shtyllat ku janë vendosur këto kamera, shtyllat janë lyer me graso. Gjithashtu para kryeministrisë nuk ka më skela, si herët e kaluara, por godina është rrethuar me një gardh metalik./Opinion.al
