Nga Partia Demokratike nuk e kanë marrë seriozisht propozimin e Kryeminsitrit Edi Rama për të zgjidhur krizën. Sekretari i Përgjithshëm i PD-së, Gazment Bardhi në një postim në rrjetin social Twitter shkruan: “Propozimi i Ramës për zgjidhjen e krizës: “Më lini ti vjedh edhe zgjedhjet vendore dhe po ti fitojë opozita zgjedhjet që unë do vjedh, shkojmë pastaj në zgjedhje të parakohshme.”
Në fjalën e tij, ku prezantoi Veliajn si kandidat për një tjetër mandat në bashkinë e Tiranës, kryeministri deklaroi se zgjedhjet e qershorit do të zhvillohen edhe pa opozitën, ndërsa u zotua se do të çojë vendin në zgjedhje të parakohshme, nëse opozita do të marrë qoftë edhe një bashki më shumë se ata, më 30 qershor.
“Nëse ju në zgjedhjet e 30 qershorit, do fitoni një bashki më shumë se ne. Jemi të gatshëm të shkojmë në zgjedhje të parakohshme. E di që ju s’do e pranoni këtë sfidë. Ju se mundni dot PS as në Kukës dhe as në Skrapar, dhe lerë pastaj në të gjithë Shqipërinë”, tha Rama.
“Unë e kam një ftesë për ju, jeni ju që ja keni rrokanisur kokën ndërkombëtarëve për reformën zgjedhore. Hajdeni ulemi ta miratojmë së bashku atë reformë, të biem dakord t’i eksperimentojmë në disa zona edhe votimin, edhe numërimin elektronik. Me që keni shumë qejf shit-blerjen e votës, do miratojmë çdo masë që do propozojë në Parlament doktoresha e shit-blerjes së votës. Ne i votojmë vetë në Parlament me deputetë e rinj që ju i keni zgjedhur”, shtoi kryeministri./Opinion.al
