Deputeti i Lëvizjes Socialiste për Integrim ka denoncuar faktin se propozimi për ndryshimin e objektit të Komisionit për Reformën Zgjedhore është futur në mënyrë “klandestine” në rendin e ditës së seancës plenare. Gjoni tha se propozimi i ardhur është në kundërshtim me atë që është rënë dakord më parë me mazhorancën.
“Futet në mënyrë klandestine një propozim i papritur, për ndryshimin e Komisionit për Reformën Zgjedhore. Unë kam kërkuar që pjesëmarrja jonë të kushtëzohej me ndryshimin e objektit, dua t’ju bëj me dije se me zonjën Hajdari kemi punuar për të ndërtuar një draft siç ramë dakord, por dje marrim vesh nga mediat që qenka bërë ndryshim nga PS për ndryshim objekti. Ulemi këtu, na hidhen në tavolinë letra që thotë: Zoti kryetar të paraqitet për votim. Kështu do bëjmë Parlament? Zoti Balla, nuk është normale. Nëse e keni me të vërtetë vullnetin pozitiv, tërhiqeni këtë vendim, nuk duhet hedhur sot për votim, hajde konsultohemi bëjmë një draft që të jeni edhe ju dakord”, tha Gjoni.
Nga ana tjetër, Taulant Balla është përgjigjur se rregullorja lë hapësirë për propozime në 24 orët e fundit, megjithëse tha se pranonte propozimet e deputetëve opozitarë. Ai tha se PS kishte vetëm një kusht për reformën zgjedhore.
“Ne kemi vetëm një kusht, votën e shqiptarëve që jetojnë jashtë territorit”, tha Taulant Balla në përgjigjen e tij./Opinion.al
