Zv.Pronari i Leicester City Aiyawatt Srivaddhanaprabha ka zbuluar se Jamie Vardy vinte i dehur në stërvitje pasi u transferua nga ekipi i Fleetwood Town për 1.3 milionë euro. Vardy iu bashkua ekipit të “Dhelprave” për një rekord të ligave të ulëta angleze prej 1.3 milionë euro në vitin 2012 por e kishte të vështirë të gjente formën ideale në sezonin e tij të parë në Championship.
Por 29 vjeçari u transformua në një nga sulmuesit më të mirë me 22 golat e tij gjatë këtij kampionati duke ndihmuar ekipin e tij të fitojë titullin kampion, por Srivaddhanaprabha pretendon se lojtari i përfaqësueses angleze kishte nevojë të edukohej për të rritur profesionalizmin gjatë muajve të parë në klub.
“Unë isha kundër transferimit të Vardy-t në fillim. Pyeta dhe mora shumë informacione rreth tij dhe fillova të besoj se ai mund të ishte një blerje e mirë por duhet t’i përgjigjesha tifozëve që ishin duke pyetur ‘si ka mundësi që një lojtar i ligave amatore kushton 1,3 milionë euro?’,” flet Srivaddhanaprabha për Day Magazine tajlandeze.
“Për tifozët unë dola si pronari më idiot që kishin parë. Pyeta drejtuesit e ekipit, nëse do të kisha vetëm 1,3 milionë euro buxhet transferimesh për sezonin e ardhshëm, kë do të blinit? Ata my përgjigjën ‘Vardy’. Atëherë unë pranova.”
“Tifozët gati sa nuk u çmendën. Disa madje më morën në telefon për të më dhënë ‘mos je budalla? Si mund të shpenzosh kaq shumë para për një lojtar amator?’.
Atëherë, ai nuk ishte lojtar për Premier League. Ditën që e blemë ai erdhi tek unë dhe më tha faleminderit që më shpëtove jetën. Ai nuk kishte pasur ndonjëherë aq shumë para dhe ishte shumë i lumtur. Ai erdhi nga hiçi direkt në Championship, çka e bëri të pinte alkool çdo ditë. Ne nuk dinim çfarë të bënim. Unë nuk dija rreth kësaj çështje deri një ditë që më tha dikush që Vardy ishte paraqitur i dehur në stërvitje.”
“Kështu që shkova vetë t’i flisja. E pyeta ‘kështu do që ta përfundosh karrierën? Mos prit se do gjesh më mirë se këtu’. Ai më tha se nuk dinte se çfarë të bënte pasi nuk kishte fituar ndonjëherë aq shumë para. Pas bisedës sonë ai nuk piu më dhe filloi të stërvitej më fortë se në të kaluarën. Ne e dinin që kishte një akselerim shpërthyes, por nuk e dinim që do të bëhej aq i mirë. Ai është një person i ri tani. Dhe kjo është shumë mirë.”
