Në Gjykatën Kundër Korrupsionit dhe Krimit të Organizuar, u mbajt sot seanca gjyqësore e dosjes “Sterilizimi” me të pandehurin ish-ministrin Ilir Beqaj.
Prokuror i çështjes është Edvin Kondili, i cili shtroi e një herë kërkesën e tij që Ilir Beqaj, Klodian Rrjepaj dhe Ilir Rrapaj, të gjykohen për “vjedhje”, duke shpërdoruar detyrën, si dhe për veprën penale “grup i strukturuar kriminal”.
Avokati i Beqajt, Ermal Yzeiraj ka kundërshtuar duke thënë se është i paqartë me akuzën e SPAK-ut.
“Unë jam i paqartë për akuzat, pasi prokuroria nuk e ka saktësuar akuzën, sepse verbalisht thonë vjedhje duke shpërdoruar detyren dhe grup kriminal, ndërsa me shkrim është shpërdorim detyre. Unë jam i paqartë për cfarë do të mbrohem”, u shpreh avokati Ermal Yzeiraj.
Ndërkohë kundër ishte edhe ish-ministri Beqaj, i cili u shpreh se nuk i është komunikuar ndonjëherë kjo akuzë.
”Unë jam përgatitur për veprën penale të shpërdorimit të detyrës. Sic më ka arsyetur për shpërdorim detyre dhe duhet të arsyetojë pse është vjedhje. Ju s’e keni thënë kurrë këtë akuzë, keni thënë vetëm fjalën pranojmë. Pa një formuli të saktë të akuzës nuk mund të përgjigjem. Në 3 krerë të ndryshëm na kanë venë nene të ndryshme të Kodit Penal. Ne jemi bërë si autoshkollë, unë nuk bëj dot mbrojtje efektive pa një akuzë të shkruar.”
