Prokuroria e Krimeve të Rënda ka vendosur të zgjasë edhe me tre muaj të tjerë hetimet për ish-kryeprokurorin Adriatik Llalla.
Hetimet ndaj Adriatik Llallës kanë nisur në mars të vitit 2018 për fshehje të pasurisë, mosdeklarim parash në kufi, pastrim parash dhe shpërdorim detyre.
Ish- kryeprokurori ka bërë ankimim në Gjykatën e Shkallës së Parë të Krimeve të Rënda kundër zgjatjes së afatit, kërkesë që pritet të shqyrtohet nga gjyqtari Bib Ndreca.
Ndërkohë, pak kohë më parë Llalla ka punësuar dy lobistë nga Nju Jorku për të kundërshtuar vendimin e Departamentit të Shtetit që e shpalli “persona non-grata” në SHBA.
Sipas investigimit të bërë nga BIRN, në datën 4 mars, studioja ligjore “Sher Tremonte” është regjistruar në Dhomën e Përfaqësuesve të Kongresit të SHBA si kompani lobimi për ish-Prokurorin e Përgjithshëm të Shqipërisë, Adriatik Llalla.
“Shfuqizimi i vendimit të Departamentit të Shtetit i datës 14 shkurt 2018, për të listuar Adriatik Llallën dhe familjen e tij të afërt si të papërshtatshëm për hyrje në Shtetet e Bashkuara”, përshkruhet si qëllimi specifik i aktiviteteve të lobimit në formular.
Adriatik Llalla u shpall i padëshiruar nga Departamenti i Shtetit një vit më parë, me motivacionin e përfshirjes domethënëse në korrupsion./Opinion.al
