Prokuroria e Përgjithshme ka lëshuar fletë arresti ndaj ish-kryetarit të Bashkisë së Vorës, Agim Kajmaku pasi ai nuk ka deklaruar në formularin e dekriminalizimit se ka qenë nën hetim nga drejtësia greke.
Komisioni Qëndror i Zgjedhjeve vendosi që t’i heqë mandatin Agim Kajmakut.
Sipas përgjigjes që Interpol Greqia dhe Interpol Tirana i kanë dërguar Prokurorisë së Përgjithshme vërtetohet se gjurmët e gishtërinjve të Agim Kajmakut janë të njëjta me Jorgo Toton, i cili është arrestuar në Greqi. Ky arrestim nuk është deklaruar nga kandidati socialist kur kandidoi për zgjedhjet e 30 qershorit për bashkinë e Vorës. Sipas ligjit, zyrtarët të cilët gënjejnë në formularin e dekriminalizimit, rrezikojnë të dënohen deri në 4 vite heqje lirie.
Prokuroria e Përgjithshme më parë i kishte kërkuar Komisionit Qëndror të Zgjedhjeve që ti heqë mandatin Agim Kajmakut dhe tashmë ka nisur ndjekien penale ndaj tij. Ndaj Kajmakut është caktuar masa e sigurisë arrest me burg pasi ai dyshohet për tre vepra penale, “shpërdorim detyre”, “falsifikim i formularëve” dhe “ushtrim i funksioneve pas dhënies fund të detyrës”.
Partia Demokratike denoncoi rastin se Jorgo Toto është i njëjti person me Agim Kajmakun e zgjedhur në krye të Bashkisë së Vorës në 30 qershor. Në bazë të një vendimi të prokurorisë dhe gjykatës së Janinës të publikuar nga PD, thuhej se ai ishte arrestuar në janar 2003 në Janinë për blerje të fidanëve dhe bimëve të tjera me para të falsifikuara. Kajmaku ka mohuar vazhdimisht akuzat ndaj tij, fillimisht për ndërrim të emrit dhe më pas se kishte qenë i arrestuar, deri në momentin kur u publikua një vendim Gjykatës së Janinës, ku pushonte çështjen ndaj tij, duke e shpallur të pafajshëm. /Opinion.al
