Prokuroria e Durrësit ka nisur hetimet për të zbardhur akuzat që shoqëria civile ka ngritur ndaj Bashkisë Durrës së drejtuar nga Vangjush Dako se ka dëmtuar zonën arkeologjike të qytetit. Aktualisht janë bllokuar punimet në zonën ku janë gjetur zbulimet arkeologjike prane torres veneciane. Ndërkohë punimet vijojnë normalisht në pjesën tjetër të sheshit ku do ndërtohet Veliera.
Në kërkesë-padinë drejtuar Prokurorisë, shoqëria civile pretendon se janë shkelur ligji “Për trashëgiminë kulturore”, ai “Për planifikimin dhe zhvillimin e territorit”, përcaktimet e Planit të Përgjithshëm Vendor të Durrësit, ligji për mjedisin dhe vendimi i Këshillit Kombëtar të Arkeologjisë, ku punimet duhet të kishin një marrëveshje paraprake trepalëshe midis Bashkisë, Institutit të Arkeologjisë dhe ASHA.
Prokuroria ka nisur shqyrtimin e dokumentacionit të Bashkisë dhe firmës zbatuese të projektit, si dhe të marrë dëshmitë e para nga specialistët e fushës për hapat që janë ndjekur apo janë shkelur ndaj zbatimit të projektit.
