Ish-deputeti i Partisë Demokratike, Klevis Balliu ka shkuar sot në Gjykatën e Apelit për tu njohur me vendimin e saj në lidhje me arrestimin e tij, pas protestës me banorët e Unazës, por seanca u shty.
Është shtyrë seanca e Gjykatës së Apelit, e cila pritej të jepte sot vendimin ne lidhje me ish deputetin Klevis Balliu. Ky i fundit është paraqitur sot në gjykatë dhe pas njoftimit se seanca u shty ai bëri një deklaratë për mediat. Megjithëse prokuroria kërkon arrestimin e tij, Balliu tha se nuk i trembet gjyqit politik.
“Seanca u shty, erdhëm të merrnin vendimin për një arrestim politik ndaj meje dhe disa banorëve të Unazës. Kjo është thjesht një çështje politike për të trembur qytetarët dhe opozitën që të mos dalë në protestë. Këto janë përpjekje mjerane. Ne vijmë po shteti nuk funksionon, kjo është arsyeja pse qytetarët ndodhen në burgje, kurse banditët janë të lirë. Del Sandër kimiku dhe bën filma, thotë janë dëmtuar policët, po s’ka asnjë polic të plagosur, veç qytetarë të gjakosur. Pavarësisht këtyre nuk ka asgjë që më ndalon mua të jem edhe sot në 7 e 30 tek Unaza, në krahë të banorëve”,- tha ish-deputeti.
Avokati i tij, Genc Gjokutaj u shpreh se prokuroria nuk ka asnjë provë për të kërkuar këtë masë ndaj Balliut.
“Është i paligjshëm si arrestimi ashtu edhe procesi, plus edhe masat që i bashkëngjiten. Ne presim ditën e mërkurë të jepet vendimi”,- tha ai
Kujtojmë se Klevis Balliu u arrestua nga policia e Tiranës më 7 maj pas përplasjes që ndodhi mes forcave të policisë dhe protestuesve të Unazës së Re të cilët kishin dalë për të protestuar kundër Kryeministrit Rama
Balliu u shoqërua me furgonin e policisë për t’u dërguar në Komisariatin nr. 6 dhe më pas në drejtorinë e policisë së Tiranës ku iu komunikua arrestimi.
Gjykata e Tiranës dha për të masën “detyrim paraqitje” për akuzat: “Kundërshtim me dhunë të punonjësve të policisë”, “prishje e qetësisë publike” dhe “pengim i qarkullimit të mjeteve të transportit”, të cilat Balliu nuk i ka pranuar. Ndërsa beteja është zhvendosur tek Gjykata e Apelit. /Opionion.al
