Jepet pretenca për Klemend Balilin. Prokuroria kërkon 18 vite burg për Balilin, i cilësuar si “Eskobari i Ballkanit”, dënim i cili ulet në 12 vjet për shkak të gjykimit të shkurtuar.
Ai akuzohet për “Trafikim të lëndëve narkotike në bashkëpunim”, “pjesëmarrje në grupin e strukturuar kriminal”, “Refuzim për deklarim, mosdeklarim, fshehje ose deklarim i rremë i pasurive”, si dhe për “Pastrim parash”.
Balili u vetëdorëzua në mëngjesin e 15 janarit në Policinë e Tiranës, pas 2 vitesh arrati. Sipas hetimeve është provuar që 47-vjeçari ka marrë pjesë në trafikun e dy ngarkesave me kanabis.
Prokuroria e Krimeve të Rënda kërkoi ditë më parë konfiskimin e pronave të Kelmend Balilit dhe kalimin e tyre në favor të shtetit. Sipas kërkesë dorëzuar në gjykatë, argumentohet se ka dyshime se këto pasuri janë produkt i aktivitetit kriminal ku është përfshirë i ashtuquajturi “Eskobari i Ballkanit”.
Konkretisht, prokuroria kërkoi konfiskimin e kompleksit turistik “Santa Quaranta” i cili ndodhet në bregdetin e Sarandës, dy troje më sipërfaqe rreth 15 mijë metra katrorë po në qytetin bregdetar.
Gjithashtu konfiskim është kërkuar edhe për 23 apartamente dhe një godinë shërbimi me sipërfaqe 120 metra katrorë. Aktualisht këto prona janë të sekuestruara me vendim gjykate dhe pas 18 mujash hetim prokuroria kërkoi konfiskimin e tyre./Opinion.al
