12 vjet burg ka kërkuar Prokuroria e Krimeve të Rënda për ish-Ministrin e Brendshëm Saimir Tahiri. Pas përfundimit të pretencës nga organi i akuzës, ish-ministri i Brendshëm, Saimir Tahiri vendosi ta bëjë vetë mbrojtjen.
Ai ka dhënë shpjegime në kontekstin historik të ngjarjeve se si kur ai ishte ministër, Habilajt nuk kishin mbrojtje pasi në tre raste ata janë proceduar tre herë.
“Policia ka referuar në prokurori në 9.6.2016 Habilajt për kultivim, kohë kur Jaeld Çela ishte drejtor i Policisë Vlorë. Më 23 Prill 2017 Dritan Prenci, prokuror i kësaj dosje, ka marrë një email me të dhena mbi Habilajt që kultivonin kanabis. Ky email është dërguar nga njëri nga drejtuesit e Policisë që po akuzohet sot për bashkëpuntor me Habilajt”, tha Tahiri.
Në këtë moment, ish-ministri ngre pikëpyetjen se pse nuk duhet të dyshojmë që ishte prokuroria që i mbronte Habilajt, pasi që nga dita kur ka nisur procedimi nga Jaeld Çela, prokuroria e ka mbajtur pa hetuar këtë çështje.
“Nëse është përgjuar Taulant Haxhiraj dhe aty thotë që janë kushërinjtë e ministrit, pse prokuroria nuk e pyeti kurrë për kë ministër bëhej fjalë, por vetëm e ka hamendësuar? Jaeld Çela akuzohet se ka ndihmuar Habilajt në 4 raste të trafikut në Itali, por pse nuk e thotë Prokuroria që Jaeld Çela nuk ka qenë drejtor e as polic në Vlorë, për tre rastet e para të trafikut”, është shprehur më tej Tahiri.
Ai ka deklaruar në gjykatë se i kanë sekuestruar telefonat ku ka rezultuar zero komunikim me Habilajt dhje të gjithë pjesëtarët e arrestuar të grupit.
“Kanë pyetur në 15 qytete në Greqi dhe në Mal të Zi nëse kam prona a pasuri që mund t’i kem përfituar nga trafiku. Kanë rezultuar negative të gjitha. Ky është proces i montuar që nga fillimi”, sipas Tahirit.
“Habilaj është përgjuar duke thënë se jam me shefin e madh në datën 22.11.2013, por unë kam qenë në Bruksel për integrimin e Shqipërisë. Në datë 23 Nëntor 2013, Habilaj është përgjuar duke thënë se jam këtu me shefin për drekë, por unë në 23 Nëntor në orarin e përgjuar kam qenë në konferencë për mediat për rastin e të arratisurve nga burgu i Drenovës. Kam qenë në zyrë në takim me kreun e SHISH, Adriatik Llallën dhe Ministrin e Drejtësisë, Nasip Naço”, ka deklaruar më tej ish-ministri Tahiri.
Në seancën e fundit, Gjykata e Krimeve të Rënda pranoi kërkesën për gjykim të shkurtuar, duke i kërkuar prokurorisë paraqitjen e konkluzioneve përfundimtare. Në këtë mënyrë, nëse gjykata pranon kërkesën e prokurorisë, dënimi për ish-ministrin ulet automatikisht me 8 vite burg./ Opinion.al
