Prokuroria e Përgjithshme i ka kërkuar Partisë Demokratike dokumentacionin që disponon për Agim Kajmakun.
Me anë të një shkrese drejtuar sekretarit të PD, Gazmend Bardhi, Njësia e Dekriminalizimit ka kërkuar dokumentacionin që PD publikoi dje ku tregohej vendimi i gjykatës së Janinës për ndalimin e më pas dhënien e masës së arrestit me burg për shtetasin Jorgo Toto.
Në letrën e saj Njësia e Dekriminalizimit në Prokurorinë e Përgjithshme ka pranuar se Kajmaku ende nuk i ka dorëzuar gjurmët e gishtave.
Në një dalje për mediat sot Gazment Bardhi deklaroi se në bazë të ligjit të dekriminalizimit, gjurmët e gishtërinjve mund të tërhiqen vetëm në sistemin biometrik të të dhenve dhe ato i kërkohen subjektit vetëm kur nuk janë në këtë sistem. Pra sipas Sekretarit të Përgjithshëm të PD, Prokuroria e Përgjithshme edhe në këtë rast po vepron në kundërshtim me ligjin për të vonuar hetimin ndaj kryebashkiakut të Vorës.
Sa i përket pretendimit se Agim Kajmaku dhe Jorgo Toto i arrestuar në Greqi nuk janë i njëjti person, PD publikoi sot dokumentet që tregonin përputhjen e identitetit mes dy personave. Pikërisht pasaporta e cila i ishte gjetur Jorgo Totos gjatë arrestimit ka të njëjtin numër identifikimi me numrin e pasaportës që Agim Kajmaku posedonte kur kishte emrin Jorgo Toto. /Opinion.al
