Prokuroria e akuzon Ervin Salianjin për kallëzim të rremë, duke e marrë të pandehur. Ai do të njihet nesër me këtë akuzë, në orën 9:00. Ndërkohë, i kontaktuar nga gazeta “Panorama”, Salianji thotë se është i vetëdijshëm për peshën dhe rrezikun që pati denoncimi, por është i qetë pasi gjithçka u vërtetua.
“Jam plotësisht i vetëdijshëm dhe i qartë apo dhe i përgjegjshëm për peshën dhe rrezikun e këtij denoncimi dhe mbështetjen e plotë që i dhashë gazetarit, i cili vuri jetën në rrezik për të thënë të vërteten. Jam plotësisht i vetëdijshëm që politika e vërtetë në një vend pa asnjë institucion drejtësie të pakapur është një rrugëtim i vështirë. Çështja “Babale” u provua e vërtetë që në çastin që vëllai i Fatmir Xhafajt u nis me urgjencë brenda 24 orëve në Itali dhe u vulos kur ministri Xhafaj dha dorëheqjen pa dhënë asnjë shpjegim askush për të. Ajo që ka mbetur të provohet ende është, a do ta fitojnë shqiptarët betejën e rëndësishme ku triumfon e vërteta pa u terrorizuar dhe pa u kërcënuar”, ka thënë ai./Opinion.al
