Pesë vite burg ka kërkuar Prokuroria e Krimeve të Rënda për ish-drejtorin e burgjeve Artur Zoto. Ish-numri një i burgjeve akuzohen për korrupsion dhe abuzime me tenderat e ushqimeve gjatë kohës që ai ushtroi detyrën.
Prokurorja Elisabeta Imeraj kërkoi që Zotos t’i hiqet e drejta për të ushtruar funksione publike per 5 vite. Sipas prokurorisë, ai së bashku me ish-nëndrejtorin e Burgjeve Iljaz Labi edhe ky në gjykim për të njëjtat akuza kishin krijuar një skemë korruptive, duke paracaktuar fituesin e tenderave të ushqimeve për të burgosurit. Labi në këtë hetim kishte dhe statusin e bashkëpunëtorit të drejtësisë, duke treguar të gjithë skemën.
Në bazë të deklarimeve të tij, tre biznesmenë përcaktonin fituesin ndermjet tyre duke paguar si ryshfet 2 milionë Lekë të reja. Këto para, sipas Labit, ai i ka dorëzuar në zyrën e Artur Zotos. Edhe për Labin prokuroria kërkoi dënimin me 5 vite por për shkak të statusit të tij u kërkua shuarja e dënimit. Dënimi me nga tre vite burgim u kërkua edhe për tre biznesmenët Ylber Kalja, Nexhmi Balla dhe Shemsi Sinani.
