Prokuroria për Krime të Rënda zbardh detaje të operacionit kundër kultivimit të kanabisit në Derven të Krujës, ku u arestuan 11 persona si pjesë e një grupi të strukturuar kriminal.
Prokuroria ka nisur hetimet që në korrik të këtij viti pas informacioneve të dhëna nga agjentët e Shërbimit Informativ Shtetëror. Burimet thonë se informacioni ka qenë i shoqëruar me fotografi konkrete të parcelave të mbjella me hashash dhe emrat e personave që merreshin me këtë aktivitet kriminal.
Gjatë kësaj kohe, thonë burimet, është hetuar me metoda speciale, ku janë evidentuar se parcelat e kanabisit të mbjella prej tyre nuk janë asgjesuar nga policia, raporton Abcnews.
Veç kësaj, hetuesit kanë provuar se pas korrjes së parcelave nga grupi tashmë i arrestuar, rrënjët janë vendosur në këtë magazinë që ndodhet në afërsi të rrugës nacionale Fushë Krujë-Thumanë për të bërë procesin e tharjes.
Me përfundimin e procesit të tharjes, çdo ditë brenda kësaj magazine punonin rreth 30 gra të zonave për rreth kundrejt 3 000 lekë/ditë, duke bërë procesin e ndarjes së boçeve dhe paketimin e saj.
Sipas akuzës, arsyeja e ndërhyrjes ka qenë fakti se është transkriptuar një bisedë telefonike, ku njëri nga të arrestuarit kërkon që hashashi të zhvendoset nga magazina.
Kjo ka bërë që Prokruoria për Krime të Rënda të kërkojë nga policia ndërhyrjen në këtë magazinë dhe në shtëpine njërit prej 11 të arrestuarve që ndodhet në kodër të Dervenit, ku u gjetën në total dhe u sekuestruan një sasi prej rreth 1.3 ton hashash.
Burimet thonë se grupi hetimor, dyshon se sasia e drogës ka qenë me e madhe për shkak edhe të madhësisë së magazinës, por që është zhvendosur në një ambient tjetër, për të cilin po punohet për ta identifikuar.
Sipas prokurorisë, 11 të arrestuarit do të hetohen për akuzat e “prodhimit dhe shitjes së narkotikëve”, “kultivimit të bimëve narkotike” si dhe vepra këto të kryera në kuadër të “grupit të strukturuar kriminal”.
