Fatos Dervishi është mes juristëve që kanë dorëzuar aplikimet për në organet e Vetingut. Dervishi ka qenë zv/prokuror i përgjithshëm në vitet 1993-1997, kur vendi drejtohej nga Sali Berisha. Ai ka emigruar prej vitesh në SHBA, ku drejton një studio ligjore. Por rikthimi i tij shihet me skepticizëm… Avokat, Idajet Beqiri e komenton Dervishin si një nga prokurorët famëkeq të përdorur nga Sali Berisha në një sërë çështjesh mes tyre edhe burgosjen e Fatos Nanos.
Në një intervistë dhënë sot për gazetën “Dita”, Idajet Beqiri shkruan se “Fatos Dervishi, ish Zëvendës Prokurori i Përgjithshëm i Sali Berishës i viteve 1993-1997, njëri ndër katër njerëzve më të zinj të Shqipërisë, (Berisha – Gazidede – Agim Shehu – Fatos Dervishi), të cilët i detyruan shqiptarët të rrëmbenin armët dhe t’ua drejtonin këtyre banditëve në vitin 1997, duke i syrgjynosur si lecka jashtë pushtetit, me nxitjen e drejtpërdrejt të Berishës, ka aplikuar për t’u përfshirë në strukturën e Vettingut”.
“Ai ka arrestuar dhe burgosur pa asnjë bazë ligjore gjithë kundërshtarët politikë të Sali Berishës. Në marsin e 1997 ky Fatos Dervishi, i bindur se prej ligësive të mëdha që kishte bërë ndaj shumë jetë njerëzish këtu në Shqipëri, mund të përfundonte në ndonjë “qenef”, u arratis në Amerikë, për të mbuluar dhe “pastruar” pisllëqet e shumta. Tani që i duhet përsëri Berishës, aplikon për të fituar si anëtar në komisionin e vettingut, dhe kështu nga krimi vimë, në krime jemi, drejt krimeve të reja me hapa të sigurta shkojmë!” thotë më tej Idajet Beqiri.
Por vetë z.Dervishi në një intervistë dhënë për gazetën “Tema”, 3 ditë më parë ka thënë se rikthehet për të kontribuar për vendin e tij. “Iu përgjigja thirrjes që kanë bërë zyrtarisht autoritetet shqiptare dhe ato ndërkombëtare, të cilët kanë kërkuar që “cilido që është patriot dhe do që të kontribuojë për vendin, ky është momenti”.
“Unë jetoj në Shtetet e Bashkuara të Amerikës, në Nju Jork prej 19 vitesh, ku kam një jetë shumë të mirë. Kam zyrën time të avokatisë dhe një jetë shumë të mirë dhe të përkushtuar profesionale”.
“Dëshira ime më e madhe që të kontribuoj në Sistemin e Prokurorisë, të cilin unë e njoh shumë më mirë sidomos në Prokurorinë Speciale (SPAK) ose në Byronë Kombëtare të Hetimit”, është shprehur Dervishi.
/Opinion.al
