Të gjithë gjyqtarët dhe prokurorët kanë nisur plotësimin e formularit “për vetingun” që në javën e parë të tetorit. Pavarësisht se ligji u ankimua nga Partia Demokratike në Kushtetuese, punonjësit e sistemit të drejtësisë nisën hedhjen në letër të të gjithë pasurive që kanë krijuar e përfituar që nga momenti kur kanë mbaruar fakultetin dhe kanë marrë detyrën deri tani.
Gjyqtarë dhe prokurorë që kanë vite në detyrë dhe që kanë punuar në rrethe të ndryshme të vendit, u ankuan disa ditë më parë se plotësimi i formularit me saktësi dhe vërtetësi u kishte nxjerrë një ngarkesë shtesë në punë, pasi duhej të shkonin nëpër rrethe për të verifikuar me saktësi shifrat e pagës apo dietave që kanë marrë dhe datat kur kanë nisur punën, kur janë transferuar dhe detaje të tjera të kësaj natyre.
Më shumë sesa përmbajtja voluminoze e formularit që u është dhënë për vetëdeklarim, gjyqtarët dhe prokurorët duket se e kanë cilësuar këtë si një “detyrë të vështirë”, për shkak se çdo gabim apo pasaktësi në formularin që po plotësojnë do t’u kushtonte karrierën më pas.
Sipas juristëve formulari në fjalë, i dorëzuar siç e kërkon ligji “për vetingun” në kohë dhe në përmbajtje, ka vlerë në rast se Komisioni i Venecias dhe Kushtetuesja lënë në fuqi ligjin në fjalë të plotë apo në mënyrë të pjesshme. Në këtë rast, zbatimi i ligjit do të shtyhej në kohë dhe për këtë arsye duket se gjyqtarët e prokurorët nuk do t’i shpëtojnë dot një detyrimi shtesë që vjen si rrjedhojë e vendimit të dhënë nga Kushtetuesja.
Sipas juristëve, nëse “Venecia” dhe Kushtetuesja lënë në fuqi plotësisht apo pjesërisht ligjin “për vetingun”, atëherë varësisht nga koha kur do të rinisë zbatimi i tij, duhet që gjyqtarët e prokurorët të dorëzojnë përsëri në ILDKPKI një formular shtesë, që përmban të dhënat për shtimin apo pakësimin e pasurive dhe fitimeve që ata kanë pasur nga data 7 nëntor 2016 e në vazhdim. Në këtë mënyrë, duket se gjyqtarët e prokurorët do të jenë të detyruar të dorëzojnë dy formularë në ILDKPKI, pas vendimit të dhënë nga Gjykata Kushtetuese. /Panorama
