Prokuroia e Kukësit ka lëshuar 24 urdhër arreste për protestën e djeshme në rrugën e Kombit. Por sipas informacioneve bëhet fjalë për një numër më të lartë të arrestuarish. Pas ankesave të familjarëve, në Kukës kanë ardhur 4 komisionerë të Avokatit të Popullit për të monitoruar më nga afër situatën.
Pas mesnatës së djeshme, forcat e policisë kanë mësyrë në banesat e personave që kanë qenë pjesë e protestës, dhe kanë arrestuar disa prej tyre. Familjarët e të arrestuarve u mblodhën mëngjesin e sotëm para Komisariatit të Policisë së Kukësit, duke kërkuar sqarime për të afërmit e tyre. Ata thanë se nuk e dinë se ku i kanë dërguar familjarët e tyre pasi i kanë arrestuar.
“Policia na erdhi nëpër banesa në orën 03:00 të mëngjesit. Nuk e dimë ku i kanë çuar personat e arrestuar”, pohuan ata.
Gjithashtu banorët janë të vendosur t’i qëndrojnë deri në fund iniciativës së tyre për heqjen e tarifës së rrugës, ndërsa paralajmërojnë protesta të tjera. Ndërkohë në Kukës ndodhen edhe disa deputetë të Opozitës për të monitoruar situatën.
