Ministri i Brendshëm, Taulant Balla ka prezantuar në Komisionin e Sigurisë pr.ligjin “Për Policinë e Shtetit”. Në fjalën e tij, ministri tha se ky projekt ligj është konsultuar me partnerët dhe me institucionet e pavarura.
Teksa renditi arritjet e punës së Policisë, ministri tha se institucionin e Policisë së Shtetit e presin edhe sfida të tjera, kjo për shkak edhe të fazës së re të zhvillimit ku ka hyrë Shqipëria.
Sipas ministrit, besueshmëria e publikut të organizata e policisë së shtetit është rritur në 72%.
“Në rast se në vitin 2013 besueshmëria e publikut tek organizata e policisë ishte 1 në 3 ne sot jemi në nivelin më të lartë, në 72 %. 7 në 10 persona në Shqipëri e shohin institucionin e policisë së shtetit të besueshëm.
Nuk duhet të harrojmë që Shqipëria po hyn në një fazë të re zhvillimi. Janë sfidat e sigurisë dhe të rendit që nuk janë ato që ishin 10 vite më parë. Jetojmë ne një moment të ri sfidash për sigurinë publike. Mos harrojmë që Shqipëria e vitit 2024, nuk është ajo e vitit 2014.
Na duhet të përgatisim organizatën policisë së shtetit të jetë e aftë për të përballur me sfidat.
Qasje të re që policia duhet të bëjë edhe në marrëdhëniet me komunitetet dhe në përballje me dhunën apo sfida të tjera.
Nisma për të hartuar një ligj të ri, për ne ka qenë një hap i rëndësishëm, për të përmbushur detyrimet në rrugën drejt anëtarësimit në BE.
Iniciativa të ndryshme ligjore kanë ardhur nga vetë policia e shtetit, për të konsoliduar përvojën deri tani, por edhe për tu përgjigjur të gjitha sfidave që do të dalin nga sot në vitet pasardhëse, shtuar këtu edhe sfidën tonë të një vizion Shqipëria 2030, vend anëtar i BE. Është fakt se Policia është agjenci ligjzbatuese e pavarur, e vetëdijshme në çdo hallkë të organizimit të vet dhe e ndërgjegjshme që ka vend për t’u përmirësuar.
Pr.ligji është një sipërmarrje e përgjegjshme, e iniciuar që në shtator 2023 dhe procesi i hartimit të tij i është nënshtruar një qasje shumë të strukturuar e shtrirë në kohë, një diskutim konstruktiv me vetë policinë e shtetit. Konsultimin prej ditës së parë dhe deri sot me partnerët ndërkombëtare”, tha ministri.
Ministri u shpreh se iniciativa ka marrë gjithë mbështetjen e partnerëve dhe ka marrë edhe nga institucionet e pavarura si një reformë e thellë dhe progresive e policisë së shtetit.
“Ky ligj do të na mundësojë adresimin e rekomandimeve të këtyre organizmave ndërkombëtare, do plotësojmë struktura që nuk i kemi. Do bëjmë gjithçka për të parandaluar cdo formë të konfliktit të interesit, pa harruar edhe objektivin tim themelor që lidhet me eliminimin e cdo hapësirë për veprimtari korruptive dhe shumë aspekte që lidhen me to”, u shpreh Balla, duke theksuar se “kjo iniciativë ka në thelb përmirësimin e integritetit të institucioneve të rendit dhe sigurisë publike”.
Sipas ministrit ky projektligj garanton rritja e transparencës në vendimmarrje dhe se në qendër vendos qytetarin.
