Qeveria ka miratuar një projektligj për ushtrinë për krijimin dhe organizimin e forcës së rezervistëve në Shqipëri. Për të na e shpjeguar më mirë ishte i ftuar në studion e Klan News ministri i Mbrojtjes, Pirro Vengu, i cili tha se kjo forcë është e integruar me Forcat aktive të Armatosura.
“Shumica e vendeve të NATO e kanë një strukturë të tillë, është e mirëorganizuar, e pajisur, e trajnuar, e stërvitur dhe e paguar”, tha ministri.
Ajo do t’i bashkangjitet në mënyrë aktive Forcave të Armatosura dhe do të shërbejë përveç situatave të ndryshme edhe në përballimin e emergjencave civile. Po kujt i jep mundësi angazhimi ligjit?
“Ligji jep disa mundësi angazhimi, qoftë për personelin ushtarak që është liruar në vitet e kaluara dhe që shprehin dëshirën për t’u rikthyer, qoftë për ushtarakët që dalin…
Po ilustroj të gjitha kategoritë: Një kategori janë ushtarakët në lirim që janë liruar para pak vitesh ose para pak muajsh të cilëve u lind e drejta që të riaktivizohen në Forcat e Armatosura me shprehjen e një dëshire të tyre. Kategoria e dytë janë ushtarakët që janë larguar nga Forcat e Armatosura jo për dëshirë të tyre por se kanë kaluar afatet e gradimit. Tashmë kanë instrumentin që të kthehen në mënyrë aktive. Kemi në Forcat e Armatosura 400 ish-personel që u lind e drejta që të na kërkojnë që të aktivizohen si rezervistë. Mundësia tjetër përbëhet nga individë që kanë punuar gjithë jetën civilë qoftë në shtet, qoftë në privat dhe shprehin vullnetin e tyre për të pasur një kontribut si rezervist”, sqaroi ministri.
Ai u shpreh se sot numri i forcave rezervë është zero, por me hyrjen në fuqi të ligjit shpresohet që të arrihet në 2100 mijë forca deri në vitin 2030.
“Përmes këtij ligji ne konsiderojmë ushtarakët tanë si kapacitet kombëtar dhe është e nevojshëm të mos flasim më për ish-ushtarakë, por ushtarakë rezervë, në lirim dhe aktiv. Realisht janë kapacitet kombëtar”, tha ai.
Por ligji parashikon edhe disa kritere si mosha dhe pastërtia e figurës.
“Kritere që duhen rivërtetuar pasi personi është larguar, duhet patjetër që të bëhet dhe një verifikim i pastërtisë së figurës. Ka një kriter kur vjen puna te mosha. Kemi për ushtarakët aktivë të thjeshtë për të hyrë në forcë rezerviste maksimalja është moshë 50 vjeç, për oficerët është 55 vjeç dhe për gradat madhore 60 vjeç. Edhe këto kritere duhen patur parasysh para se ish-ushtarakët të bëjnë kërkesën për rikthim në forcën rezervë”, tha Vengu.
