Pas sulmeve ndaj Iranit dhe pasi pretendon se arriti armëpushimin mes Teheranit dhe Tel Avivit, presidenti i Shteteve të Bashkuara të Amerikës, Donald Trump, është ndalur tek çështjet e brendshme.
Ai i ka bërë një thirrje të fortë publike senatorëve për miratimin e menjëhershëm të projektligjit të taksave që ai e quan “Ligji i Madh, i Mrekullueshëm dhe i Bukur”.
Në një deklaratë të shpërndarë në platformën e tij Truth Social, Trump thekson se pas arritjes së paqes jashtë vendit, është koha që Shtetet e Bashkuara të hyjnë në “Epokën e Artë”.
“Kjo do të jetë një dhuratë historike për popullin e madh të Shteteve të Bashkuara të Amerikës, teksa fillojmë festimet për 250-vjetorin e vendit tonë. Më në fund po hyjmë në Epokën tonë të Artë, e cila do të sjellë siguri, mbrojtje dhe mirëqenie të paparë për të gjithë qytetarët”, tha Trump.
Trump u bëri thirrje të drejtpërdrejtë senatorëve që të mos largohen nga Washington-i pa përfunduar punën.
“Mbylluni në një dhomë nëse duhet, mos shkoni në shtëpi dhe përfundoni marrëveshjen këtë javë. Askush nuk shkon me pushime derisa të miratohet”, tha ai.
Ai kërkoi gjithashtu bashkëpunim të ngushtë mes Senatit dhe Dhomës së Përfaqësuesve që projektligji të miratohet pa vonesë dhe të arrijë në tryezën e tij për firmosje.
“Populli amerikan do të jetë shumë më mirë falë punës sonë të përbashkët,” përfundoi ai, duke e mbyllur deklaratën me sloganin e njohur: Ta bëjmë Amerikën sërish të madhe!
Kujtojmë se projektligji u miratua me një votë më shumë, 215-214, në Dhomën e Përfaqësuesve. Tashmë është radha e Senatit për ta kaluar dhe më pas shkon për firmosje tek presidenti Trump në Zyrën Ovale.
Projektligji ka pasur shumë debate pasi pason me ndryshime të mëdha në Medicaid, programet e ndihmës ushqimore, sigurinë e kufijve dhe taksat.
Sipas Zyrës së Pavarur të Buxhetit të Kongresit (CBO), ky projektligj do të ulë taksat me 3.75 trilionë dollarë, por nga ana tjetër do të rrisë deficitin me 2.4 trilionë dollarë.
Projektligji i taksave dhe i shpenzimeve u komentua edhe nga Elon Musk pas “divorcit” me Trump. Ai e quajti “masiv, skandaloz dhe plot me shpenzime”.
