Qeveria ka dërguar në Kuvend për miratim projektligjin për Buxhetin e Shtetit të vitit të ardhshëm. Sikurse është bërë me dije edhe më herët, në lidhje me rritjen e pagave për vitin 2022, qeveria planifikon që të ketë një shtesë mesatare prej 6 për qind. Rritje të pagës përfitojnë mësuesit dhe personeli shëndetësor.
Po ashtu vërehet se qeveria ka parashikuar të shpenzojë rreth 637 miliard lekë kundrejt 536 miliard lekë të ardhura. Në këtë mënyrë, qeveria planifikon të ketë një deficit buxhetor prej rreth 101 miliard lekësh, të cilat do t’i mbulojë duke marrë borxh brenda dhe jashtë vendit.
“Shpenzimet e personelit për vitin 2022, reflektojnë koston aktuale të Administratës Publike, si dhe politikën e re të rritjes së pagave kryesisht për sektorët e shëndetësisë, arsimit dhe mbrojtjes. Fondi vjetor për rritjen e pagave është planifikuar në shumën 2.4 miliardë lekë dhe parashikon rritjen e pagës për funksion me 6% për punonjësit shëndetësor dhe ata arsimorë. Shpenzimet totale për pagat në Administratën Publike janë planifikuar në masën 90.6 miliardë lekë ose 4.9% e PBB-së”, parashikon Ministria e Financave në buxhet.
Ndërkohë qeveria planifikon që të bëjë një rritje minimale të pensioneve gjatë vitit 2022 duke marrë në konsideratë vetëm indeksimin e tyre në treguesit e inflacionit.
Shqipëria është karakterizuar nga një inflacion i ulët gjatë viteve të fundit, i cili nuk ka kaluar 2%, ç’ka tregone dhe se edhe rritja e pensioneve gjatë vitit të ardhshëm pritet të jetë rreth kësaj mase.
Qeveria ka parashikuar në buxhet një fond prej 2.6 miliard lekësh për indeksimin e pensioneve, ndërsa lajm i mirë është parashikimi edhe i një fondi tjetër prej 3.5 miliard lekësh me qëllim dhënien e një bonusi ndaj pensionistëve për festat e fundvitit.
Në lidhje me bonusin e bebeve janë parashikuar 2.2 miliard lekë, kurse të përndjekurit është parashikuar një fond prej 1 miliard lekësh.
