Dështimi do të përkeqësonte frikën për një zjarr më të gjerë në një rajon që eksporton pjesën më të madhe të naftës në botë. Teherani ka paralajmëruar vendet fqinje që kanë baza amerikane se do të përballeshin me “pasoja të rënda” nëse do të përfshiheshin në ndonjë sulm ushtarak amerikan ndaj Iranit.
“Ka një shans për mirëkuptim fillestar për negociatat e mëtejshme nëse pala tjetër (SHBA) hyn në bisedime me një qëndrim të barabartë,” tha Araqchi për TV iranian.
Udhëheqësi suprem Ayatollah Ali Khamenei, i cili në strukturën komplekse të pushtetit të Republikës Islamike ka fjalën e fundit për çështjet kryesore shtetërore, i ka dhënë Araqçit “autoritet të plotë” për bisedimet, tha një zyrtar iranian për Reuters.
“Kohëzgjatja e bisedimeve, të cilat do të jenë vetëm për çështjen bërthamore, do të varet nga serioziteti dhe vullneti i mirë i palës amerikane”, tha zyrtari, i cili kërkoi të mos përmendet emri.
Irani ka përjashtuar mundësinë e negocimit të aftësive të tij mbrojtëse, siç është programi i tij i raketave balistike.
