Pas lajmit se një person është gjendur i djegur në një ashensor në qytetin e Sarandës, është bërë edhe indentifikimi i personit që ka humbur jetën në rrethana ende misterioze. Personi i gjendur i karbonizuar në ashensor është Agim Proda, 58 vjeç, banues në qytetin e Sarandës, me funksion vëzhgues në Federatën Shqiptare të Futbollit. Proda kishte 10 vite që e ushtronte këtë detyrë dhe mendohet se kryer akt vetëflijimi. Ai u gjet në gropën e ashensorit të një pallati në ndërtim plotësisht i karbonizuar sot në mesdrekë rreth orës 14.00. Ndërkohë që vetë Federata Shqiptare nëpërmjet një postimi në faqen e saj zyrtare i ka shprehur ngushëllimet familjes.
“FSHF dhe Presidenti Armand Duka shprehin ngushëllimet e tyre më të sinqerta për ndarjen e parakohshme nga jeta të një prej bashkëpunëtorëve më të ngushtë për zonën e jugut dhe jo vetëm, vëzhguesit të saj Agim Proda, njëherësh edhe ish-arbitër ndërkombëtar i FIFA-s në vitet 86-88′. Me hidhërim shumë të madh FSHF ka mësuar lajmin për ndarjen nga jeta të kolegut Proda në moshën 58-vjeçare.
Z.Proda gjatë gjithë këtyre viteve ka kryer funksionet e vëzhguesit të ndeshjeve në garat e futbollit shqiptar.
FSHF përcjell ngushëllimet e saj për familjarët, të afërmit dhe miqtë e z.Agim Proda duke mbajtur njëherësh në kujtesë të gjatë kontributin e tij të vazhdueshëm në futbollin shqiptar”, shkruhet në mesazhin e ngushëllimit të FSHF-së.”, thuhet në komunikatë.
