Klement Balili, i njohur ndryshe si “Eskobari I Ballkanit” ka qenë një nga emrat më të lakuar në dy vitet e fundit në politikën e ditës në Tiranë.
I konsideruar si një person me mbështetje të fortë politike, Balili deri në vitin 2016 mbante detyrën e Drejtorit të Transportit në Sarandë.
Problemet e tij me drejtësinë filluan pasi mediat greke raportuan që një biznesmen nga Saranda ishte kryetari i një organizate kriminale të trafikut ndërkombëtar të drogës me lidhje të forta politike në Shqipëri.
Po kështu media greke në atë kohë shkruante se 46 vjeçari, baroni i kartelit të drogës në Ballkan po mbrohet nga politika në Tiranë, si dhe theksonte pafuqinë e policisë shqiptare për ta arrestuar.
Balili në një intervistë televizive atë kohë i mohoi akuzat, ndërkohë që vetëm pak ditë më pas u largua pa lënë gjurmë.
Arrestimi i Balilit ka qenë edhe një kerkesë e vazhdueshme e ish-ambasadorit amerikan Donald Lu, që e përmendte emrin e tij në daljet publike si një ndër peshqit e mëdhenj që s’janë kapur.
Gjatë këtyre dy viteve Policia e Shtetit ka kryer 14 operacione për kapjen e Balilit, por pa sukses.
