Delina Ibrahimaj është emëruar në krye të Drejtorisë së Tatimeve pas shkarkimit të Enton Duros. Që prej nëntorit të vitit 2016, ajo drejtonte Institutin e Statistikave.
Ibrahimaj mban gradën Doktor (PhD) në Bankë dhe Financë nga Universiteti i Romës, Tor Vergata.
Ka përfunduar studimet e larta në Universitetin e Bocconit në Milano, Itali, ku është diplomuar për Ekonomi Ndërkombëtare dhe më pas ka kryer masterin për Menaxhim të Përgjithshëm po në të njëjtin universitet.
Ajo ka një përvojë të gjerë në kryerjen e analizave ekonomike, fituar gjatë eksperiencës së punës në Bankën e Shqipërisë dhe pranë Kryeministrisë si koordinatore për krijimin e një sistemi të integruar shkëmbimi informacionesh dhe statistikash operacionale të Instituteve shtetërore.
Gjithashtu Ibrahimaj ka njohuri të thella në menaxhimin e projekteve, marrëdhëniet me donatorët si dhe menaxhimin e aktiviteteve operacionale, financiare dhe të marketingut, falë eksperiencës së saj si drejtuese në sektorin privat. Po ashtu ka qenë pjesë e disa publikimeve dhe studimeve në fushën e ekonomisë dhe financave.
Enton Duro është shkarkuar nga detyra e drejtorit të Përgjithshëm të Tatimeve. Ai kishte vetëm pak muaj që mbante detyrën e rëndësishme. Më 27 mars të këtij viti, Duro zëvendësoi në krye të Tatimeve ish-drejtoreshën Vasilika Vjero./ Opinion.al
