“Ai është një futbollist dhe ajo gazetare. Nuk bëhet fjalë për dyshen e famshme, Kasijas-Karbonero, por për Xhovani La Kamerën dhe Monika Bertinin”.
Kështu e nis shkrimin portali italian “mattinopadova.gelocal.it”, që pak kohë më parë i ka kushtuar hapësirë historisë së dashurisë mes mesfushorit që ka firmosur me Partizanin dhe gazetares bukuroshe që aktualisht drejton një nga emisionet sportive në “Mediaset”.
“Nuk mund të them se jam një velinë, pasi kam më shumë se 10 vite që punoj si gazetare dhe e kam njohur Xhovanin gjatë një interviste që isha duke i bërë pas një ndeshje mes Parmës dhe Riminit. Në atë periudhë unë punoja për një televizion në Parma dhe ai luante me skuadrën e Riminit në Seria B.
E dua shumë punën time, madje jetoj për të dhe kjo më ka bërë që të kem shumë të përbashkëta me Xhovanin”, është shprehur Monika, e cila flet hapur edhe për xhelozinë mes çiftit, duke qenë se shpeshherë i takon të qëndrojnë larg njëri-tjetrit, kjo edhe për shkak të impenjimeve që La Kamera ka.
“Është e vërtetë që ka pasur rast në të cilat nuk jemi parë shumë, megjithatë nuk jam vetëm unë xheloze. Gjëja më e rëndësishme është që mes nesh ka besim”, ka thënë Monika, e cila duket se do të vizitojë edhe Shqipërinë në të ardhmen, duke qenë se bashkëshorti i saj, do të luajë me fanellën e Partizanit.
PROPOZIMI
Por, përveçse një lojtar të cilin trajneri Iuliano e ka kërkuar me ngulm ta ketë në skuadër, La Kamera është edhe një romantik i lindur. Këtë e konfirmon edhe Monika, e cila tregon momentin kur La Kamera e ka propozuar për martesë. “Papritur ai më vuri kufjet në vesh dhe unë dëgjova këngën tonë të preferuar (Thuaj një lutje për ty e Aretha Franklin) dhe me mbylli sytë. Dhe kur unë i hapa u gjenda përballë unazës dhe më erdhi propozimi për martesë”, ka vazhduar Monika, e cila zbulon edhe disa detaje të karakterit të lojtarit më të ri të skuadrës së Partizanit.
“Mund të them se ai nuk është vetëm romantik, pasi është gjithashtu edhe kokëfortë dhe i paduruar”, ka mbyllur rrëfimin e saj gazetarja italiane për 33-vjeçarin, që pritet të jetë një nga titullarët e Partizanit në sezonin e ardhshëm.
FIRMA
Emri i La Kamerës te skuadra e Partizanit ka dalë në skenë një ditë përpara prezantimit të trajnerit Mark Iuliano me të kuqtë. La Kamera ishte italiani i parë që ka firmosur me të kuqtë. Ai, La Kamera, ka kaluar pjesën më të madhe të karrierës së tij në Serinë B dhe C italiane, duke luajtur me skuadra si Rimini, Benevento, Pavia, Çitadela, Padova, Komo apo edhe Lupa Roma.
33-vjeçari luan në rolin e mesfushorit të qendrës, por gjatë karrierës së tij ka luajtur edhe në krahun e majtë, ndërsa shihet më shumë si një futbollist me tipare mbrojtëse se ofensive.
