Në barazimin 0-0 të Anglisë dhe Gjermanisë në “Wembley”, Ruben Loftus-Çik jo vetëm debutoi, por u shpall edhe lojtari i ndeshjes përballë rivalëve historikë. Mesfushori i talentuar nuk e zhgënjeu besimin e trajnerit Garet Sauthgejt, duke e eklipsuar Mesut Ozilin. Por cilat janë 10 gjërat që ne nuk dimë për talentin 21-vjeçar të Çelsit, i cili këtë sezon është i huazuar te Kristal Palas.
1. Shtëpia e tij në “Cobham” u godit nga rrufeja qershorin e vitit të shkuar, 11 vite pasi ajo kishte goditur shtëpinë e familjes së tij në Suonlej (Kent). Dhe pastaj thonë që rrufeja nuk godet dy herë…
2. Ruben është gjysmëvëlla nga ana e babait të tij me ish-sulmuesin e Njukasëllit, Karl Kort, dhe ishmbrojtësin e Kristal Palasit, Leon Kort.
3. Ai ishte pjesë e skuadrës së Çelsit, e cila fitoi finalen e “UEFA Youth League” në 2015, së bashku me Temi Abraham dhe Dominik Solanke.
4. Në vetëm 29 ndeshje në Premier Ligë, ai ka luajtur për 5 trajnerë: Zhoze Murinjo, Gus Hidink, Antonio Konte, Frenk De Bur dhe Roi Hoxhson.
5. Murinjo kërkoi që Loftus-Çikut t’i jepej një medalje kampioni, pasi luajti në 3 ndeshje të Çelsit kampion 2014-15, përpara se të luante 6 herë sezonin e fundit, duke marrë një tjetër medalje.
6. Legjenda e Gjermanisë, Mikael Balak, është frymëzimi i tij. “Trajnerët e mi më thoshin gjithnjë: ‘Shiko ndeshjet e tij, shiko Balakun’”, tregon Ruben.
7. Ai shënoi me goditjen e parë në portë për Çelsin kundër Skanthorpit në Kupën FA, në 2016.
8. Mesfushori debutoi për Çelsin U-18 kur ishte vetëm 14 vjeç.
9. Ai është lojtari i parë i Kristal Palasit që starton me Anglinë në “Wembley” që prej Xhef Tomasit, në shkurt 1992.
10. Loftus-Çik u shpall lojtari i Turneut Tulunë për Anglinë U-21 pas golit që shënoi në finalen kundër Francës.
