Nelgert Pata, personi i cili ishte pre e një atentati ditën e djeshme pranë rrugës së Kavajës në Tiranë, nuk është një emër i panjohur për drejtësinë. Sipas një verifikimi që ka bërë Opinion.al mbi jetëshkrimin e këtij shtetasi, bëhet me dije se në vitin 2008, Nelgert Pata së bashku më babain e tij Astrit Pata janë gjykuar nga organi i akuzës për shfrytëzim prostitucioni.
Denoncimin ndaj tyre e ka bërë shtetasja Silvana K. nga Memaliaj me vendbanim në Gjermani e cila e pyetur në gjykatë për aktivitetin që kryenin Nelgert Pata atë kohë 24 vjeç dhe babai i tij Astrit Pata 50 vjeç, ka rrëfyer se në vitin 2004 ajo ishte njohur me Astrit Patën në lokalin e të vëllait të tij në Tepelenë, ku vajza punonte si kameriere. Po sipas vajzës, Astrit Pata i kishte kërkuar më pas të shkonin së bashku për pushime në Greqi. Premtimet për të kaluar ditë të këndshme në shtetin fqinj, kishin rezultuan boshe.
Silvana K, thotë se Astrit Pata e kishte dërguar me dokumente false në Norvegji, ku atje e kishte pritur djali i tij, Nelgerti, në atë kohë sapo kishte mbushur 20 vjeç, i cili i kishte kërkuar të punonte në rrugë si prostitutë. Ajo nuk kishte pranuar, sikundër ka thënë në dëshminë e saj, por pas kërcënimeve të shumta, ju nënshtruar urdhërave. Sapo ka mundur të shpëtojë nga tutorët, vajza ka bërë denoncim ndaj tyre dhe ka rrëfyer me videokonferencë se nuk mund të jetonte dot me paratë e mishit të saj dhe tmerrin që ka përjetuar, teksa punonte në rrugët e Norvegjisë.
Për të vërtetuar thëniet e saj, ka udhëtuar drejt vendit nordik dhe pesëshja e gjyqtarëve të Krimeve të Rënda, prokurori i çështjes si dhe një avokat mbrojtës. Të pandehurit Astrit dhe Nelgert Pata, akuzohen gjithashtu për trafikimin në tetor të 2005-ës të një tjetër gruaje, nënë e një fëmije. Sipas prokurorisë, ajo ishte njohur në Greqi me Nelgertin, i cili e kishte mashtruar se do t’i gjente një vend pune si kameriere në Norvegji. Por më pas, e kishte detyruar të dilte të prostituonte në rrugë. Astrit dhe Nelgert Pata u arrestuan pas një letër-porosie të mbërritur nga Norvegjia, në prill të vitit 2006.
