Përgjigja e Ministrisë së Energjisë pak ditë me parë nuk e ka shuar debatin me prodhuesit privatë të energjisë elektrike. Në një reagim të dytë për mediat, shoqata e prodhuesve të energjise ka kundërshtuar qëndrimin e ministrisë duke e quajtur atë qëllimisht të pasaktë.
Prodhuesit privatë te energjisë elektrike thonë se po fshihet e vërteta. Sipas tyre, Qeveria ka vendosur të heqë investitorëve të drejtat ligjore të fituara më parë dhe t’i zëvendësoje me kontrata që sipas prodhuesve cënojnë hapur të drejtat e tyre.
Prodhuesit pretendojnë se prishja e kontratave te shitjes me KESH dhe zevendësimi i tyre me kontrata me OSHEE u sjell atyre pasiguri ne investime.
Prodhuesit e HEC-eve kanë kontrata koncesionare, ku kushti për investimin në vlera të larta shoqërohej me garanci nga ana e qeverisë për të blerë energjinë e prodhuar, madje me nje çmim mbi vlerën e tregut.
Ndërkohë, Ministria e Energjisë, prej dy vitesh po punon për të liberalizuar tregun.
Me ndryshimet e fundit, sipërmarrësit e HEC-eve trajtohen si tregtare e jo prodhues të energjisë.
Rrjedhimisht atyre nuk u sigurohet blerja e të gjithë energjisë së prodhuar.
Investitoret shprehen të shqetësuar nga nxitimi sipas tyre i qeverisë për të firmosur kontratat e reja. Pasiguritë lidhen edhe me masat e ndermarra tre vitet e fundit, ku si fillim u ul 20 % çmimi i blerjes së energjise tek prodhuesit e HEC-eve.
Ministria e Energjisë në fund të javës së kaluar u përgjigj prodhuesve duke theksuar se kontratat e reja nuk cënojnë të drejtat e parashikuar me kontratat koncesionare, duke theksuar se e gjithë liberalizimi i tregtisë është i domosdosheëm për reformën që po ndermerret në sektorin e energjisë.
