Këtë të enjte pritet të mbahet “Procesi i Berlinit” i cili do të mbledhë krerët e Ballkanit Perëndimor me ftesë të kancelarit Olaf Sholz.
Mësohet se do të jetë pikërisht Kancelari Scholz që do të hapë si mikpritës samitin në orën 09:15.
Në fokus të këtij samiti do të jetë kriza energjetike dhe mënyrat alternative që duhen gjetur për të siguruar energji.
Liderët e rajonit pritet të nënshkruajnë 3 marrëveshje që parashikojnë lëvizjen e lirë me karta identiteti, njohjen e diplomave universitare dhe njohjen e kualifikimeve për tre profesione: mjekët, dentistët dhe arkitektët.
Në takim pritet të marrin pjesë 6 krerët e vendeve të të Ballkanit Perëndimor, por edhe Presidentja e Komisionit Europian Ursula Von Der Leyen dhe Presidenti i Këshillit Evropian, Charles Mishel.
Në fund të të gjithë këtij takimi do të ketë një konferencë të përbashkët për shtyp me kancelarin Olaf Sholz, presidenten e KE, Von Der Leyen dhe kryeministrin Edi Rama sepse sesioni i radhës i Procesit të Berlinit do të mbahet në Shqipëri.
