Kryeministri Edi Rama ka reaguar ditën e sotme për procedimin e ish-Drejtorit të Policisë Bashkiake Florenc Hoxha, i cili ndaloi një automjet me ushqime që do të shpërndaheshin për Iftar.
Nëpërmjet një statusi në rrjetet sociale Rama shkruan se një veprim i tilllë për besimtarët myslimanë është një çmenduri e padëgjuar.
Ndër të tjera Kryeministri është shprehur se gjithçka që na duhet është durimi, besimi dhe qetësia, e sipas tij e diela do të jetë dita vendimtare që do të shënojë fundin e mallkimit të së shkuarës.
“Ndalimi i dhunshëm i disa iftareve mbrëmë nga paramilitarët e “mbrojtjes së votës” është një çmenduri e padëgjuar!Thirrja ime është qetësi, qetësi, qetësi, durim, durim, durim, besim, besim, besim! E diela do të shënojë fundin e mallkimit të së shkuarës mbi rrugën e shqiptarëve,”– shkruan Rama.
Kujtojmë se policia njofton se ditën e djeshme, shtetasi Bledar Goga ka kërkuar ndihmën e Policisë, pasi disa persona i kishin bllokuar rrugën në lagjen Ibra, fshati Vaqarr, duke e kërcënuar të zbriste nga makina, me pretendimin se në këtë mjet kishte produkte ushqimore që përdoreshin në këmbim të votës.
Ndërkohë që, nga veprimet e kryera ka rezultuar se ushqimet ishin përgatitur për t’ua shpërndare për iftar, besimtarëve mysliman që agjërojnë./Opinion.al
