Procedim penal për dy skafistët që u shpëtuan dje nga anija ushtarake

Janë proceduar penalisht nga Policia e Durrësit dy skafistët e shpëtuar dje në ujrat e detit Adriatik.
Policia e Durrësit njofton se shtetasi me inicialet, A.J. 51 vjeç, banues në Vlorë dhe D.L. 32 vjeç, banues në Brindizi, Itali do të hetohen në gjendje të lirë me akuzën e kalimit të kufirit në mënyrë të paligjshme.
“Më datë 06.11.2016 shtetasit e mësipërm kanë qenë duke ardhur me një mjet tip “Motoskaf” me mbishkrimin “Pantera” nga Brindizi, Itali për në Shqipëri.
Në vendin e quajtur Sazan, Vlorë kanë dhënë sinjalin SOS dhe i është dhënë ndihmë nga një anije ushtarake dhe më pas mjeti është ankoruar në Portin Detar Durrës.
Nga ana e Specialistëve janë kryer të gjitha veprimet e para proçeduriale ndaj këtyre shtetasve dhe ka rezultuar se ata kanë kaluar kufirin pa kryer proçedurën përkatëse.”, njofton policia.