Pas kryerjes së vaksinimit anti – Covid qytetarët njoftohen nëpërmjet një mesazhi kur çertifikata është gati për t’u shkarkuar në portalin e – Albania. Por qytetarë të ndryshëm i janë drejtuar redaksisë së Tv Klan, pasi kanë konstatuar parregullsi në hedhjen e këtyre të dhënave në sistem.
Pra, ka ndodhur që personi i ka marrë të dyja dozat e vaksinës por të dhënat nuk pasqyrohen në e – Albania as pas disa muajsh.
Në sistem nuk figuron data e saktë e kryerjes së dozave.
Kur personi ka injektuar një vaksinë që është e ndryshme nga ajo që i shfaqet në portal. Madje edhe raste kur doza e dytë është regjistruar si një dozë e parë dhe procesi konsiderohet i paplotë.
Nisur nga këto shqetësime Tv Klan u interesua pranë Ministrisë së Shëndetësisë se si duhet të veprojnë këta qytetarë.
Fillimisht ata duhet t’i drejtohen pikës së vaksinimit ku kanë kryer këtë procedurë për t’u interesuar nëse të dhënat e formularit që kanë plotësuar janë të sakta. Ose në rast se të dhënat nuk figurojnë në sistem, po aty mund të marrin pergjigje për vonesen e krijuar.
Po ashtu për qytetarët që ndeshin pasaktësi në dozat e vaksinimit Ministria ka vënë në dispozicion emailin: [email protected]
Përmes një kërkese për informacion, qytetarët mund të parashtrojnë shqetësimin e tyre dhe te marrin një përgjigje brenda pak orësh.
Certifikata e vaksinimit njihet elektronikisht në të gjitha vendet e Bashkimit Europian, sipas rregullave respektive të secilit vend./Tv Klan
