I dënuar me burgim të përjetshëm, Dritan Dajti, ka dalë sërish nga qelia për shkak të problemeve me shëndetin.
Burime për ABC bëjnë me dije se ai i është drejtuar Qendrës Spitalore Universitare për të hequr një gur në veshka.
Dritan Dajti është paraqitur në spital nën masa të rrepta sigurie. Operacioni është kryer brenda ditës dhe më pas Dajti është rikthyer sërish në spitalin e Burgut ku do të qëndrojë deri në momentin e rehabilitimit.
Ky është rasti i dytë kur Dritan Dajti i arrestuar për vrasjen e katër efektivëve të policisë, del nga qelia për nevoja shëndetësore. Në muajin Janar ai doli nga ambientet e burgut për t’iu drejtuar një klinike dentare në zonën e Ish-Bllokut. Për këtë ngjarje ministrja e Drejtësisë, Etilda Gjonaj, largoi nga detyra disa drejtues.
Dritan Dajti, u dënua me burgim të përjetshëm nga Gjykata e Shkallës së Parë me akuzën e vrasjes në rrethana cilësuese të oficerëve të policisë, Fatos Xhani, Sajmir Duçkollari, Altin Dizdari dhe Kastrit Feskaj gjatë një operacioni policor për kapjen e tij në vitin 2009./ Opinion.al
